Дејгиди…

Леле бе луџе, зошто ќутите? Аман, до кога вака? Не ни знаев до денес дека речиси на самиот плоштад ни се има инфилтрирано „Peruvian Flute Band“! Ова ми се случи на маргините на моето лобирање кај децата на плоштад во врска со оној багабонт-бенд од Дедо мразовци. Има ли некој информации од кога? Денес поминав и кога ги видов се стаписав. Анбиливибол! И сите нешто ќутат?!? Демек револуција во Грција, демек НАТО, демек природни катастрофи? А ваков потенцијален дизастер ни се рокнал пред врата!

Бендот под итно да се стави во апсаана, спектакуларно апсење пред камери пред сите можни телевизии, печатени медиуми + Кирилица и Нептрес, побашка. Сакам да ја видам нашата полиција навремено да реагира и да се погрижи за мирот и безбедноста во државата, е така. Каков Хисен Џемаили, каков Бродец, какви тензии во Прешево, каков шверц со мигранти и бело робје, ова мора да се регулира под итно, за да можеме на мира и на раат да спиеме барем за празнициве.

Автентични слики од македонскиот „sleeper cell“

Се разбира причините за ова се повеќе од познати. Чисто „реда ради“ ќе ставам линкови, инаку срамота е да не се знае каква опасност ни бдее и демнее од страна на овие софистицирани пара-терористи на денешницава.

Како што беше убаво објаснето во епизодата „Pan Flute Epidemic“ од дванаесеттата сезона на South park, ваков инфлитриран бенд може да ја уништи државата до темел. Како што може да се види од следниов фото-кадар, нашата државичка веќе беше дел од ова грозоморно сценарио:

Ги молам љубезно надлежните да реагираат уставно и законски и да ја отстранат оваа закана на начин кој и доликува на една вечна земја која води сметка за мирот, редот и поредокот, благодарам.

Мислам дека ако сакате да бидете чесен родител и на своето дете да му дадете фер шанса да го разбира животот во чиста форма и да биде единка која ќе води здрав промислен и исполнет живот, треба да му ја кажете вистината за Дедо Мраз. Не постои Дедо Мраз таков каков што децата мислат дека има или таков каков што родителите им го „продаваат“. Нема, тоа е, не ги лажете децата затоа што тоа не е „бела лага“, туку родителска грешка со сериозни последици во нивниот понатамошен живот.

Кои се сѐ злоупотребите на Дедо Мраз?

Прво, родителите преку Дедо Мраз го субституираат недостатокот на сопствено внимание кон децата. Тоа во западниот свет е поистакнато, но полека ќе ентропира и кај нас. Добрината на Дедо Мраз кој носи подароци е некој вид критично дополнение или целосна замена на вистинската родителска грижа. Родители, Дедо Мраз како тенденциозен симбол за добрината на луѓето не врши работа, не озбилно ви викам, замислете се малку, колку е нашиот свет подобар отако го смисливме Дедо Мраз? Приказната за Дедо Мраз не е како онаа за Бамби која ги учи децата дека природата и животните се прекрасни и дека треба да се грижиме за нив. Приказната за Дедо мраз не прави тешки потрошшувачи и нѐ отуѓува од нашите блиски, татковци, макји, баби, дедовци… 

Второ, мислам дека вистинските дедовци треба да оформат свое здружение (или синдикат, ама да не бидат со Ванчо Муратовски, тоа никако), и да се бунтуваат против овие маскирани неранимајковци кои ни ги лажат децата. Наместо искрената љубов без фенси кул подароци на баба и дедо, која е вистинската радост што можете да им ја приредите на децата кои ги сакате, ги имате овие багабонти кои ви бараат пари за да се сликате со нив. Знам дека дедовците се презафатени со играње шах и бистрење политика, но крајно време е сега да преземат чекори за враќање на својот углед и природната улога во детствата на нашите дечиња. Добро, не мора тоа да биде како револуцијата во Грција, ама да се преземе нешто, крајно време е.

Трето, задоени со вакви ранодетски симулакруми, подоцна се комплицира нашата способност да проѕираме низ манипулациите кои безбели ќе ни ги приредува кој и да е на власт, економска, политичка, секаква. Па ќе ти треба читање на едно 120 до 150 книги (од Чомски, до Жижек) за да сфатиш дека НВО-ата не се Легии на Дедо мраз кои нудат „подароци“ наоколу, туку се или перални за капиталот што циркулира на „маргините“ на слободниот пазар и кој треба да се „ресоцијализира“, дека кампањите на естаблишментите се дозволен проток на јавни финансиски средства за легализирано корумпирање на медиумите и ПР секторите. Стварно, подобро да не се мачите со Чомски и Жижек, едноставно баталете го Дедо мраз. Башка и поефтино е, мене книгите само на овие двајца ме чинеа стотици евра, минимунГ.

Одам сега на плоштад и да им ја соопштам грубава, но здрава како вакцина против вируси, вистина на едно 70-тина деца. Дедо Мразовци хирајкам, вардете си ги лажните бради!

Ако се мислевте што беше поентата на немногудамнешнана кампања за кирилица и нејзина промоција, одговорите стигнаа со Дедо Мраз. Тоа да ти било заговор на телекомуникациските провајдери за цедење на домашните корисници преку нивните СМС пораки!

Да, да, вистина, вистина...

„Трите мобилни оператори во своите понуди гордо истакнуват дека преку мобилните телефони може да се пишува и на македонски јазик со кирилско писмо. A, премолчија дека СМС-пораката напишана со 160 македонски печатни букви се наплаќа како за две, а понекогаш и како за три пораки напишани на латиницa.“

Колку да биде размерот на заговорот поголем, за тоа успеаја да изврбуваат (или изманипулураат?) и еден Влатко Стефановски (уште едно разочарение покрај Милчовски) да нѐ манипулираат и да ги експлоатираат нашите добронамерни патриотски филинзи. Страмота бреј!!! До кога, до кога се прашувам!

Големата слика на неверендинг заговорите е дека сега треба да се разочараме во сите, вклучително и во големите синови на оваа нација и да си побараме надеж за спас во некој нов спасител, во некој Пастир можеби?

Следува преводот на стиховите од рекламната нумера за оваа кампања, кога истата ја слушате од позади нанапред:

Еве острам фактури, барам финти за кампањи,

печатни, ракописни, кирилични,

триесет и еден денар, весело пеат во хор на жица,

и секој денар за една буква,

од нашата азбука, кирилииица…

Реф: Читатајте, пишувајте, во секоја прилика,

двојни сметки плаќајте, кирилица, кирилица…

да ја сочуваме компанијата од секоја неприлика,

со кирилица, кирилица…

Ебиги иефџи, шо ќе ти се странски азбуки,

најважно од сѐ е, АБВГДЃЖЕ…

да не ги заборавиме,

нашиот јазик е економски, нашето писмо е профитско,

во аманет ни е оставено, пред многу векови, за многу векови.

Реф: Читатајте, пишувајте, во секоја прилика…

пс: Иако поракава е со висока саркастичност и пародичност, не се исклучени некои сосем реални идни рефлексии во нашиве насушни живеачки (TM)

Ретро-мито-дистописка Македонија:

Македонија видена на Flickr (мислам дека според оваа перцептивна матрица требал да биде осмислен овој горниот или некој од следните спотови за промоција на вистинска Македонија).

Чест дел од нашите градски муабети е сељаштвото. Нашата фасцинација и фрустрација, о која контрадикција, од сѐприсутноста на ниската култура или поточно некултурата во нашава средина е едно од најендемичните чувства кој еден примерен сограѓанин може да ги доживее во Македонија.

Сите се расфрламе и често сме ангажирани со констатирање и верификација на феноменот сељаштво, па еве само последнава недела јас лично констатирав околу 50-тина случаи на пројави на разноразни типови и поттипови на сељаштвото. Верувам дека повеќето од нас, зависно од денот и степенот на активност, како и интензитет на движење, се горе-долу на иста линија по бројот на блиски средби со овој урбан феномен. Сељакот нема потреба од некоја строга научна дефиниција, него или неа  интуитивно ги препознаваш и доживуваш.

Кои се корените на сељаштвото во МК?

Постојат две главни генеолошки јадра на овој феномен кај нас: едната е миграцијата село-град, другата е процес на затупување во урбана средина, или т.н. автогенеза на сељаштвото.

Во првиот случај имаме ситуација на колизија на обичаите и вредносниот систем од една средина во друга. Се работи за процес на не-адаптација на видовите, вака Дарвинистички кажано. Во другиот имаш самовиреење на овој феномен, или автентична некултура изникната на градска почва. Бројни се факторите во овој процес на автогенерирање на сељачката некултура, а како главни фактори можат да се наведат: генетика, медиуми, комшилок, семејни компликации, и слично.

Она што е специфично и за двата поттипа секако е дефицитот од социјална интелигенција. Тоа е нешто како разбирање на другиот и човечка способност да го видиш светот и од поинаква перспектива од твојата лична, и секако да се грижиш во одредена конвенционална смисла за другите околу себе. Е тоа е ти е НЗС на сељаштвто, кој веројатно само со засилен увоз може да се регулира. Вака останува кризата со дотур на социјална интелигенција во домашни услови да се регулира што поскоро, инаку дебалансот може да предизвика вистинска експанзија на сељачките вредности.

Во историско-дијахрониска смисла се смета дека една од првите пројави на сељаштвото на овие простори е ликот на Црна Арапина. Тој ти е една од вертикалите на сељаштвото на овие простори од кои јас се фасцинирав утше во основно одделение. Кутриот Крали Марко од него немаше мира, толку сељаков Арапина аздисуеше што мораше Марчи само со топанот да го смирува. Денес тоа не е возможно, баш штета.

Мора да се признае дека сељаштвото е како пиреј, можеш да го корнеш, да го газиш, ама некако успева да преживее и да опстои како некултура. Затоа е мошне важно, ако сакаш да го разбереш и разградиш од внатре, пред сѐ да го запознаеш сељакот во себе, и потоа, збогатен со оваа будистичка методика да тргнеш по долгиот пат на борба со оваа појава.

Она што го направи Грција во Букурешт во однос на Македонија беше всушност активација на вирус кој може да ја урниса ЕУ, барем во сегашнава форма. Вирусот се вика „балканизација“. Се наоѓаме во ситуација како Нео при доаѓање во „Градот на машините“ во „Matrix Revolutions“ (алегорична сцена со нашата реалност, Македонија и се обраќа на Машината наречена ЕУ администрација, па само замени Агент Смит=балканизација, Матрикс=ЕУ):

Постои само еден можен начин за деблокада на аспирациите на Македонија кон НАТО и ЕУ. Еден и единствен. Колку што е можен овој начин, толку е и рационално, реал-политички незамислив, но во суштина иако е целосно надреалистичен, тој и те како e потенцијално функционален, за да ни заврши работа. Кој е тој начин?

Формулата е следна: Две-три посети на државниот врв во Техеран (Иран), склучување на некаковси договор за стратешко партнерство и економска соработка (као ова Србите со Русите), договор за правење мирољубива нуклеарка (за струја, ионака ни треба) и оп, да видиш драстична промена и во ЕУ и во НАТО, па ќе видиш како одеднаш ќе се претргнат да ја прекинат соработкава и да ја натиснат Грција па че вијш како че влеземе инстантно во двете асоцијации. Знам смешно е, но мене реалноста ми е уште посмешна :)и